បាត់ដំបង៖ មន្ទីរធនធានទឹក និងឧតុនិយមខេត្តបាត់ដំបងចេញសេចក្តីជូនដំណឹងទៅដល់អាជ្ញាធរ និងប្រជាពលរដ្ឋឱ្យមានការប្រុងប្រយ័ត្នចំពោះជំនន់ទឹកស្ទឹងសង្កែដែលនឹងហក់ឡើងសារជាថ្មីបន្ទាប់ពីភ្លៀងបន្តធ្លាក់ឡើងវិញ។
យោងតាមការចេញផ្សាយនៅព្រឹកថ្ងៃទី២០ ខែតុលា ឆ្នាំ២០២១នេះ មន្ទីរធនធានទឹក និងឧតុនិយមខេត្តបាត់ដំបង បានជូនដំណឹងទៅដល់អាជ្ញាធរគ្រប់លំដាប់ថ្នាក់ និងបងប្អូនប្រជាពលរដ្ឋ ជាពិសេសកុមារតូចៗ និងចាស់ជរា ដែលរស់នៅតាមបណ្តាអូរព្រែក ស្ទឹង ទាំងអស់សូមមេត្តាបង្កើនស្មារតីប្រុងប្រយ័ត្នអោយបានខ្ពស់ ដោយសារផ្នែកខាងលើ(ស្រុកសំឡូត) មានភ្លៀងធ្លាក់ជាបន្តបន្ទាប់ធ្វើអោយពេញអាងស្តុកទឹក។ មន្ទីរធនធានទឹក និងឧតុនិយម បានបើកទ្វារទឹកអាងទំនប់ពហុបំណងបាត់ដំបង (បើកទ្វារទឹកកំរិតធម្មតា)ដើម្បីបន្ថូរបរិមាណទឹកដែលពេញអាង។
គួរបញ្ជាក់ថា កាលពីថ្ងៃទី១៥ដល់១៧ ខែតុលា ឆ្នាំ២០២១កន្លងទៅនេះជំនន់ទឹកស្ទឹងសង្កែបានហក់ឡើងកម្ពស់ ១៣,៩៥ម៉ែត្រ បានបណ្តាលអោយមានការលិចលង់បង្កផលប៉ះពាល់ទៅដល់លំនៅឋានរបស់ប្រជាពលរដ្ឋរាប់រយខ្នង និងខូចខាតហេដ្ឋារចនាសម្ព័ន្ធផ្សេងៗជាច្រើនផងដែរ ប៉ុន្តែមិនបណ្តាលអោយមានគ្រោះថ្នាក់ដល់អាយុជីវិតមនុស្ស ឬ សត្វឡើយ៕
